ტერმინი "მგრძნობიარე კანი" არის ქოლგა ტერმინი კანის სხვადასხვა მდგომარეობებისთვის, როგორიცაა ფსორიაზი, სებორეა, ატოპიური დერმატიტი, მგრძნობელობა კონკრეტული ნივთიერებების მიმართ, სიწითლე, კანის აქერცვლა და ბუშტები. მგრძნობიარე კანის მქონე ადამიანები უჩივიან მუდმივ გაღიზიანებას და ქავილს და აღნიშნავენ, რომ ესთეტიკური პრობლემის გარდა ეს სიმპტომები უარყოფით გავლენას ახდენს მათი ცხოვრების ხარისხზეც.
არის თუ არა მგრძნობიარე კანი ქრონიკული?
არა, არ არის აუცილებელი. ზოგიერთი ადამიანის კანზე გავლენას ახდენს გარდამავალი სეზონები ან ექსტრემალური ამინდი. ზოგ შემთხვევაში კი სტრესი იწვევს მგრძნობელობას, შესაბამისად კანი მგრძნობიარე მხოლოდ სტრესის დროს ხდება. მაგალითად, კოსმეტიკური მკურნალობის შემდეგ, როგორიცაა ლაზერული ეპილაცია ან ღრმა პილინგი, კანი შეიძლება გახდეს უფრო დაუცველი. ასეთ დროს კანზე უნდა ვიზრუნოთ მგრძნობიარე კანის საჭიროებების შესაბამისად და კანის მოვლის რუტინისთვის შევარჩიოთ სპეციალურად მგრძნობიარე კანისთვის განკუთვნილი საშუალებები.
რა განსხვავებაა მგრძნობიარე კანსა და ალერგიას შორის?
ალერგია - ალერგიული რეაქცია (გაღიზიანება, შეშუპება, სიწითლე) სპეციფიკურ ინგრედიენტზე - მაგალითად, ალერგია მარწყვზე. როგორც კი მარწყვის მიმართ ალერგიული ადამიანი მარწყვს მიირთმევს ან შეეხება, მას აღენიშნება ალერგიული რეაქცია.
მგრძნობიარე კანი - არსებობს უამრავი პოტენციური კანის გამაღიზიანებელი, კონკრეტული ნივთიერებებით დაწყებული, ამინდის ცვლილებით ან თუნდაც ტანსაცმლით დამთავრებული. მგრძნობიარე კანის მქონე ადამიანებმა უნდა გამოიყენონ მხოლოდ სპეციალურად მგრძნობიარე კანისთვის შექმნილი პროდუქტები.
რითი განსხვავდება სპეციალურად მგრძნობიარე კანისთვის შექმნილი პროდუქტები სხვა პროდუქტებისგან?
მგრძნობიარე კანისთვის შესაფერისი პროდუქტების შემუშავების პროცესი მკაცრად რეგულირდება. დიდი ყურადღება ექცევა ინგრედიენტების შერჩევას, რომლებიც აკმაყოფილებენ ყველაზე მგრძნობიარე, დაუცველი კანის საჭიროებებს. კანის მოვლის საშუალებები მგრძნობიარე კანისთვის შეიცავს შერჩეულ, სუფთა, სურნელოვან ზეთებს, რომლებიც არ იწვევს გაღიზიანებას.
ნატურალური ან ორგანული პროდუქტები ყველა შემთხვევაში შესაფერისია მგრძნობიარე კანისთვის?
კანის მგრძნობელობაზე გავლენას არ ახდენს ის ფაქტი, ორგანული ან ნატურალურია თუ არა ესა თუ ის პროდუქტი. კანი, რომელიც მგრძნობიარეა კონკრეტული ნივთიერების მიმართ, მგრძნობიარე იქნება მის მიმართ, თუნდაც ის ორგანული იყოს.
რა განსხვავებაა ჰიპოალერგიულ ტესტირებასა და მგრძნობიარე კანისთვის ტესტირებას შორის?
პროდუქტის გამოყენების შემდეგ, ორივე შემთხვევაში მოწმდება კანის გაღიზიანება. მგრძნობელობის ტესტირება უფრო მკაცრად ითვლება, რადგან ის ტარდება კონკრეტულად მგრძნობიარე კანის მქონე ადამიანებზე. ჰიპოალერგიული ტესტირება კი ტარდება შემთხვევით შერჩეულ ჯგუფზე.
ტესტირებას ატარებენ ჯანდაცვის სამინისტროს მიერ დამტკიცებული კვლევითი ინსტიტუტები, დერმატოლოგის ხელმძღვანელობით. ტესტის წარმატებით დასრულების შემდეგ, პროდუქტებს ამტკიცებს ჯანდაცვის სამინისტრო, ხოლო მგრძნობელობის ტესტირება რეგისტრირდება პროდუქტის ლიცენზირებაში. უკვე ამის შემდეგ, ზოგადი კოსმეტიკური ლიცენზიის გადაკეთება ხდება სპეციალურ კოსმეტიკურ ლიცენზიად. მხოლოდ იმ პროდუქტების შეფუთვებზე, რომლებმაც გაიარეს ტესტირება მგრძნობელობაზე, შესაძლებელია მიეთითოს, რომ პროდუქტი დამზადებულია მგრძნობიარე კანისთვის. მრავალი კომპანია ტესტირებისა და სპეციალური ლიცენზიის გარეშე აცხადებს, რომ მათი პროდუქცია მგრძნობიარე კანისთვისაა შექმნილი. ამიტომ, ეცადე, ყოველთვის ყურადღებით წაიკითხო შეფუთვაზე დატანილი ინფორმაცია.
